पथलैया । बारा जिल्लाको जितपुरसिमरा उपमहानगरपालिका–१ पथलैयामा पार्किङ गरेर राखिएको टाटा कम्पनीको खाली ट्रक चोरी भएको छ। ट्रक लिएर फरार भएका सहचालकको खोजी कार्य तीव्र रूपमा भइरहेको प्रहरीले जनाएको छ।
प्रहरीका अनुसार २०८३ साउन ३ गते राति करिब ९ बजे हेमराज थापाका छोरा ३१ वर्षीय चालक अनोज थापाले आफ्नै घर अगाडि पार्किङ गरी राखेको ना ६ ख १३५७ नम्बरको टाटा ट्रक नाम, थर र वतन नखुलेका सहचालकले कसैलाई जानकारी नगराई आफुखुशी लिएर हिँडेका हुन्।
ट्रक हराएको थाहा पाएपछि चालक अनोज थापाले साउन ४ गते बिहान ६:१० बजे प्रहरी चौकी पथलैया बारामा जानकारी गराएका थिए। जानकारी प्राप्त हुनासाथ प्रहरी हवल्दार मोहर कुमार दासको कमाण्डमा दुई जनाको टोली घटनास्थलतर्फ खटिएको थियो।
घटनास्थल प्रहरी चौकी पथलैयाबाट करिब ७०० मिटर पूर्वतर्फ पर्ने प्रहरीले जनाएको छ। फरार सहचालक र ट्रकको खोजीका लागि प्रहरीले थप अनुसन्धान तथा खोजतलास कार्य जारी राखेको छ।
उक्त ट्रकका धनी जितपुरसिमरा उपमहानगरपालिका–१ निवासी सोम गुरुङ रहेको प्रहरीले जनाएको छ।
