रञ्जन यादब
बारा १७ जेठ
राकेश भक्त पौडेल मृत्यु प्रकरणमा अनुसन्धानमा ढिलाई भईरहेको भन्दै घट्नाको सत्यतथ्य बाहिर निकाल्न स्थानीयले प्रहरीलाई दबाब दिएका छन् । जीतपुरसिमरा उपमहानगरपालिका वडा नं.६ का ३८ वर्षीय राकेशभक्त पौडेलको हत्याको घटनामा प्रहरीले ढिलो गरी अनुसन्धान थालेपछि स्थानीयले दबाव दिने मानस्कितामा पुगेका हुन् ।
उपमहानगरको नगर प्रमुख -मेयर), उपप्रमुख (उप मेयर), राजनीतिक दलका प्रतिनिधि, उद्योगी, व्यवसायी, शिक्षकसहितको टोलीले हत्याको १९ दिनपछि दोषीलाई कारबाहीको माग गर्दै ईलाका प्रहरी कार्यालय, सिमरामा ध्यानाकर्षण गराएका हुन् ।
अनुसन्धान ढिलो गरिनुले प्रहरी दबाव र प्रभावमा परेको स्थानीयको आरोप छ । आक्रोशित स्थानीयले प्रहरी कार्यालय घेराउ, राजमार्गमा चक्काजाम गर्ने स्थिति बनेपछि राजनीतिक दलको सक्रियतामा सर्वपक्षीय समिति बनाइएका हुन् ।सर्वपक्षिय बैठकका सहभागीले प्रहरीले अनुसन्धानमा तदारुकता नदेखिाएकोप्रति शंका व्यक्त गरेका छन् ।
बाराको जीतपुरसिमरा उपमहानगरपालिका-६ का ३८ वर्षीय राकेशभक्त पौडेलको मृत्युको घटना अनुसन्धानका लागि प्रहरीले ९ जनालाई पक्राउ गरेको छ ।प्रहरीले जीतपुरसिमरा-६ कै १६ वर्षीया किशोरी, १७ वर्षका किशोर, ४३ वर्षका चित्रबहादुर केसी, २४ वर्षका सुमन योञ्जन, २६ वर्षका सन्दीप थापा, २८ वर्षका सन्तोष खत्री, ४० वर्षका खगेन्द्र रिजाल, ३५ वर्षका उद्धव अधिकारी र ३२ वर्षका कुमार मगरलाई पक्राउ गरेको हो ।
१६ वर्षीया किशोरी, खगेन्द्र, चित्रबहादुर, खगेन्द्र, उद्धव अधिकारी र सन्तोष खत्रीलाई कर्तव्य ज्यान मुद्दामा अनुसन्धानका लागि हिरासतमा राख्न प्रहरीले अदालतबाट अनुमति लिइसकेको छ भने अरुलाई अदालत पेश गर्न बँँकी रहेको प्रहरीले जनाएको छ ।
मृतकको परिवारले ५ जना विरुद्ध कर्तव्य ज्यान मुद्धामा किटानी जाहेरी दिएको थियो । तर थप ४ जनामाथि पनि अनुसन्धान गर्नुपर्ने देखिएकाले उनीहरुलाई पनि पक्राउ गरिएको जिल्ला प्रहरी कार्यालय बाराका प्रवक्ता प्रहरी नायब उपरीक्षक राजेश थापाले जानकारी दिए ।
वैशाख ३० मा नेकपा (माओवादी केन्द्र)को तर्फबाट वडा ६ को वडा सदस्य पदको उम्मेदवारी दिएका चित्रबहादुरको घरमा पौडेलको मृत्यु भएको थियो । पौडेलको मृत्यु भएको दिन चित्रबहादुर के.सि.को घरमा बैशाख २९ गते जमघट र भोजभतेर थियो ।
