प्रतिनिधिसभा निर्वाचन २०८२ फागुन २१ गतेलाई लक्षित गर्दै बाराको कलैया स्थित सिदेश्वर मावि मतदान केन्द्र (क र ख) मा बिहिवार नमुना मतदान कार्यक्रम सम्पन्न गरिएको छ। जिल्ला निर्वाचन कार्यालय बारा र मुख्य निर्वाचन कार्यालयको संयुक्त आयोजनामा कार्यक्रम सञ्चालन गरिएको हो।
नमुना मतदान कार्यक्रममार्फत मतदान प्रक्रियाको अभ्यास गरिनुका साथै मतदानका क्रममा आउन सक्ने सम्भावित समस्या र त्यसको समाधानबारे जानकारी गराइएको थियो। साथै सुरक्षाको डेमो प्रस्तुत गर्दै शान्तिपूर्ण र व्यवस्थित मतदानका लागि गरिएका तयारीबारे अवलोकन गराइएको थियो।
मतदान केन्द्रमा तीन वटा छुट्टाछुट्टै लाइनको व्यवस्था गरिएको थियो। महिला मतदाताका लागि एक लाइन, पुरुष मतदाताका लागि अर्को लाइन र ज्येष्ठ नागरिक, अशक्त तथा असहाय मतदाताका लागि विशेष छुट्टै लाइनको व्यवस्था गरी मतदान प्रक्रिया कसरी अघि बढाइन्छ भन्ने नमुना प्रस्तुत गरिएको थियो।
मुख्य निर्वाचन अधिकृत प्रकाश अधिकारीले निर्वाचनका सम्पूर्ण तयारी पूरा भइसकेको जानकारी दिँदै आजको नमुना मतदान कार्यक्रममार्फत आवश्यक व्यवस्थापन र समन्वयको परीक्षण गरिएको बताए।
त्यसैगरी, बाराका प्रमुख जिल्ला अधिकारी धर्मेन्द्र कुमार मिश्रले जिल्लामा सुरक्षाका सम्पूर्ण तयारीहरू पूरा भइसकेको उल्लेख गर्दै चारवटा निर्वाचन क्षेत्रका मतदान केन्द्र र मतदान स्थलहरूको निरन्तर अनुगमन भइरहेको जानकारी दिए।
नमुना मतदान कार्यक्रमले निर्वाचनको दिन हुने वास्तविक मतदान प्रक्रियालाई थप व्यवस्थित, सुरक्षित र प्रभावकारी बनाउन सहयोग पुग्ने अपेक्षा गरिएको छ।
बारामा नमुना मतदान कार्यक्रम सम्पन्न
साझा गर्नुहोस्
