कलैया : एलिजा फाउण्डेसन नेपाल काठमाडौंले आफ्नो आठौं वार्षिकोत्सवको अवसरमा एक विद्यालयमा शैक्षिक सामाग्री वितरण गरेको छ। उसले बाराको कलैया उपमहानगरपालिका–१७ सुराहीस्थित श्री लोकतान्त्रिक गणतन्त्र प्राथमिक विद्यालयमा बुधबार शैक्षिक सामाग्री वितरण गरेको हो।
त्यहाँ एक सय २५ थान ब्याग तथा शैक्षिक सामग्री वितरण गरेको छ। सो कार्यक्रममा फाउण्डेसनले केक काटेर आफ्नो वार्षिकोत्सब मनाएको थियो। फाउण्डेसन आठौं वर्ष पुरा गरी नवौं वर्षमा प्रवेश गरेको हो।
उक्त कार्यक्रममा फाउण्डेसनकी अध्यक्ष तथा प्राइम टेलिभिजनकी डाइरेक्टर एलिजा गौतमले विद्यालयका कक्षा १ देखि ५ सम्मका विद्यार्थीहरूलाई सामाग्री वितरण गरेकी हुन्। उनले ब्याग, कापी, कलम, फुटबल लगायत शैक्षिक तथा खेलकुद सामग्री वितरण गरेकी हुन् ।
विद्यालयका प्रधानाध्यापक राजेश साहको अध्यक्षतामा सो कार्यक्रम भएको हो। उक्त कार्यक्रममा कलैया–१७ का वडा सदस्य अबास अन्सारी, लोकतान्त्रिक मुस्लिम संघका केन्द्रीय अध्यक्ष डा. कमरुल्लाह अन्सारी, लोसपा महिला संगठनकी केन्द्रीय सदस्य ममता तिवारी लगायतले शुभकामना मन्तव्य दिएका थिए।
कार्यक्रमलाई सम्बोधन गर्दै अध्यक्ष गौतमले आफूले सानैदेखि शिक्षा र स्वास्थ्य क्षेत्रमा चासो राख्दै आएको बताइन्। उनले बोल्नुभन्दा काम गरेर देखाउनु नै आफ्नो उद्देश्य रहेको जनाइन्। आगामी दिनमा पनि शिक्षा क्षेत्रमा निरन्तर सहयोग गर्ने प्रतिबद्धता उनले जनाइन्। विद्यालयका गरिब तथा असहाय बालबालिकासँग वार्षिकोत्सव मनाउन पाउँदा निकै खुसी लागेको उनले भनिन्।
कार्यक्रममा वडा सदस्य लक्ष्मी पटेल, फाउण्डेसनकी सञ्जना थापा, विद्यालयका शिक्षक भवानी मिश्र, सीता साह, कार्यालय सहयोगी सुगन्धी पटेल, विनय पटेल, रन्जय यादव, सोनालाल पटेल, विद्यार्थी, समाजसेवी तथा सञ्चारकर्मीहरूको उपस्थिति रहेको थियो।
कार्यक्रमको स्वागत शिक्षक भवानी देवी मिश्रको थियो।सञ्चालन सञ्चारकर्मी रमेश साहले गरेका थिए।
